My Trieste: 2013

sabato 16 novembre 2013

giovedì 10 ottobre 2013

lunedì 16 settembre 2013

domenica 23 giugno 2013

mercoledì 29 maggio 2013

lunedì 27 maggio 2013

giovedì 9 maggio 2013

romeo e paride

"PARIDE te lo trovavi quasi sempre in piazal de San Giusto nele ore libere, lui iera un messo Comunal.
Più avanti, quando che Checo "campaner" xe sta mandà via e che xe subentrà GIOVANIN custode del campanil dela Catedral, PARIDE andava a aiutar 'sto GIOVANIN a venderghe ai turisti e ai visitatori i biglieti per andar in campanil e ricordini de Trieste.
PARIDE iera quel che gaveva vissù più de tuti le situazioni comiche creade dela "clapa" del Rion, anche perchè PARIDE, carigador impareggiabile, el creava volentieri proprio lui certe situazioni e iera anche quel che dopo le rendeva publiche e più coloride, contantole in osteria a tuti i amici.
Durante el periodo del "Teritorio Libero" vigniva a Trieste tante gite in pulman de "turisti" disemo, che le se riversava quasi sempre in piazal de San Giusto, de dove che se podeva amirar el panorama dela cità, i monumenti, la Cesa e el Castel.
Difati, el posto iera el più ideal per rinverdir momenti patriotici e nostalgie per tuti e de poder sperar prima possibile de riunirse de novo a la Madre Patria (l'Italia).
I cosideti "turisti" più comuni iera, gnanche a dirlo, i veneti e i furlani; anche perchè i più vizini de Trieste.
Iera gente pitosto modesta se no adiritura povera che penso i profitava de ste gite organizade de qualche Asociazion o de qualche Partito, per veder un poco de mondo senza spender tanti soldi.
Infati, quando che i andava a l'ora de pranzo in osteria de NINA, de solito i ordinava solo l'acqua, perché tuto el resto i se lo portava drio de casa: vin, pan, carne frita, 'rosto, ovi duri, ecc...
Quando che 'sti turisti i 'rivava in piazal su a San Giusto co'l bus, i smontava davani la nostra Catedral e subito i andava dentro per visitarla con interesse e curiosità. Magari anche per pregar, e dopo i se dirigeva verso el Campanil per andar suso a goderse un poco de fresco e la bela vista.
Contava PARIDE che come che i entrava ne l'ingresso del Campanil, el primo dela "mandria" diseva spavaldamente a altra vose: "Andiamo a visitare il Campanile di San Giusto!"; però, come ch'el vedeva la tabela tacada sul muro con su scrito "Visita al Campanile Lire 20", imediatamente el cambiava espression e impalidindo el concludeva con la frase "Vinti franchi.....boja can, trope scale, trope scale!"
Giovanni Duiz, S'cenze Triestine 1946-1954